磁性的獨白
呢排夜晚煲新紮師兄續集，多年來除咗哥哥，最中意就係張SIR (梁朝偉) 呢把咁特別嘅獨白聲音!
尤其以前喺蒙特利爾冰天雪地的日子裡聽特別有Feel!
追夢人
作詞：梁朝偉
聽講有一個地方 嗰度冇嘈雜嘅聲音
只有雀仔嘅叫聲 同埋喺唔同季節裡面啲好好聽嘅風聲
嗰度冇污染嘅空氣 只有花草樹木發出嘅香氣
嗰度冇無理嘅暴力 人與人之間只有和諧嘅相處
嗰度亦都冇物質上嘅享受
所以人同人之間 仲有嗰份純真嘅感情
其實 係人都知呢個世界上面根本冇一撻咁嘅地方 但我相信有
一直都好希望能夠同女人喺呢一撻地方度生活
呢個係我咁多年嚟嘅夢想
我同女人講叫佢同我一齊去 佢叫我唔好咁傻
佢話呢個世界根本冇一撻咁嘅地方
我叫佢俾一年時間我
喺我離開嗰陣 我見到女人坐喺門邊度喊
架火車沿住嗰條無盡頭嘅軌道向前行
生命就好似反方向咁同我經過
唔知仲要經過幾多風景 嗰撻地方先至會出現
對於將來嘅唔肯定 同我今次要去搵嗰撻地方嘅心情一樣
但係咁又有乜所謂
或者 有啲人永遠都唔會安於現狀
唔識得去珍惜佢而家擁有嘅嘢
一年之後 我返番嚟呢個地方 我終於見番女人
佢似乎瘦咗好多 面色仲好似唔係幾好添
我話俾佢聽我搵到嗰撻地方 不過我一啲都唔開心
因為原來佢唔喺我身邊嗰陣 任何地方都係一樣
佢冇答我 或者喺我離開嗰日佢已經知道我遲早都會咁同佢講…
