學員如何選擇私人教練，大致上分為三類:
1.完全零接觸
2.已有初步接觸
3.已有一定水平想再突破

今日談第3類 : 已有一定水平想再突破

當你有這個想法時，即表示你是知道自己在網球技術上有好多不足，打左咁耐又冇乜寸進，而現在或之前的教練又好似幫助不大，感覺只是喂波多及似陪你打波多，自己亦已嘗試好多方法自我改進而無功，好想進步。

要決定找個能幫到你的教練，要如何選擇呢？

我估計佔這水平的波友非常多，你已識打及已不斷開局計分，或已開始參加不同等級之賽事，打左幾年打來打去都是咁上下水平，眼見人地越打越好，自己好想進步打好d。

我强調: 不進則退 這個道理

要突破現有框框，選擇教練，首先要留意以下幾點:

a. 選教練最理想他是現役及正參與本地聯賽或任何公開比賽。
b. 淨喂波操練及口講如何點打法是不太啱用。
c. 能教你各項技術打法，腳步技巧， 能糾正及改善你不足是非常重要。
d. 一定要懂得戰術運用去操練，講求實戰效率。

此類教練大多數從口碑上已得知一二，單從場外去找去碰運氣一定是徒然，
所有教練廣告一定會講到天下無敵，兼有崇高理念, = BS。

你打咁耐都未能寸進，問題多是出於自己本身之打法有異或錯誤，才令你容易受傷或停滯不前，
正所謂之: 學壞手勢。

話明要突破，一定要講求實際，講多毋謂，睇進度睇成績大於一切。

a. 選擇現役參與聯賽或公開比賽之教練，不能選擇太低級數，太低又如何幫你改善呢，起碼要揀乙組或以上，仲要看其比賽成績，取其實戰經驗頗重要，因要講埋落場如何掌控節奏，少d經驗根本吾知，勿聽講他以前是乜乜物物，要講現在。(曾是甲+球員除外)

b. 你應見過好多教練和學生定點操波，操正反手，直線斜線，截擊…..等等，
但你有否諗過現實地，對手回球是否和你教練喂波比你之力量，旋轉及位置一樣嗎？對手會將波喂比你食嗎？
可惜現實地，根本完全是兩碼子嘅事!!! 你和外面波友一比拼便知咩回事，會否覺得練咁耐都……冇乜料到@@”
一定要實操實練兼備。

c. 好多時因你基本擊球動作有誤，加上舊手法又根深蒂固，引致控制落點位置都較難處理得好，只能淨打底線抽撃，兩邊細角落點吾知點做，如果你以前打法是有效的話，就不用好似現在咁，
所以，你一定要比d決心肯去改變，學一d你少做或無做過嘅擊球手法，腳步及各項技巧，心理戰略等，一定要學全面性的打法。

d. 要在場上戰勝對手，實戰操練各項戰術戰略尤為重要，淨喂波去操不太實際，而是要用對賽方式去實踐才中用。
當你打順境波時就當然是要風得風啦，但遇到逆境波時，咩叫做手緊或發波瘟時，如何扭轉乾坤!!! 少d材料及經驗嘅教練都除時考起。

你有沒有遇上以上經驗呢!

我常强調，你打一扳正手和人地打一扳正手，看似接近，但點解效果會相差咁遠嘅?
內裡其實包含好多細微動作要跟進，只要動作正確，流暢有序，靚嘅撃球其實不需咁用力，學啱正確動作，你一路打便自會一路進步。

網球比賽好特别，每盤之賽果是沒有打和的，必分勝負，但要知道你輸在那裡，教練有冇和你去分享經驗呢。

作為一個優質教練，並非只教打波咁簡單，好多溝通技巧及關於比賽心理控制，預防受傷，及適體能訓練方面知識都要兼顧，這點要留意。

最近在報章看見幾張有關今年參加渣馬的市民賽前熱身照片，覺得幾得意，就是他們正在熱身，仲系沿用至今之熱身動作，點解會在此談及呢?
因為現在之跑手熱身動作，已經改變好多，你搜尋下坦桑尼亞跑手是如何熱身便知我講緊乜，網球亦一樣。

所以你會見我常提及，一定要與時並進，網球教練亦需要不斷進修，去吸收新打法，新技術去增值自己，去灌輸比你的學生，切勿固步自封，自我陶醉。

去到現在，你見我好强調實戰，原因是: 比賽並非只講你個人打得叻便算，仲要講好多落場操守及心理戰術，如何刻服手緊現象，如何控制比賽節奏等等，
由知道比賽時間，對手外觀及打法，擇毫，揀發球先後及揀場，面向太陽之打法如何處理等等好多技巧，通通都要談及，解釋所有比賽規例及實踐。

最理想是能看看教練親自落場對外作賽(不是和學生)，過程中教練在比賽之洋相便即時現型，吹幾勁都冇用。

教練本身如果有好技術當然好，所謂識吾識教，你吸吾吸收得到是最實際，你每一堂都一定能感受到，能感覺得到，你所改變的是否受用及有成效，時間就是金錢。

常言道 : 讀書不是求分數，我認同的，但不太適用於網球運動，
話明想突破，即是想進步，我是好看重你如何落場贏波得分及取勝，更需要賽後檢討。

要知道 : 學無前後，達者為先，
進步快慢，睇成果便知，上仗贏你的，現在你贏佢，捉到老鼠就是好貓。
（題外話: 梅利/費達拿有板比你睇，我個人認為拿度是時候要多一位教練去幫佢突破，因我喜歡他的鬥心，好想拿度盡快回歸）

最後都係果句 : 揀教練，一定要揀口碑好為優先，口碑好是包括埋球品好，切勿用價錢高低去看。

仲有，這類教練，一般都比較爆鐘，日教夜教仲要抽時間去作賽，所以哈哈哈……

終
祝大家，球技猛進。

- 蘇師傅