T牌提早玩完: 運輸署杜絕濫用試車牌 (轉文)
早 2星期收到封運輸署嘅信，以前好少見過個信封會咁大咁厚，都知唔會有好嘢。打開一睇，原來係有關試車牌嘅新法例。以前試車牌因為印上紅色字同有個紅色套， 所以俗稱「紅牌」，不過將來就會多一個「藍牌」，係專為左軚試車而設，話就話方便道路使用者同執法者識別，但其實好明顯係針對啲玩天價左軚超級跑車嘅有錢 人。
因為有唔少有錢人使幾百萬買部超級跑車返嚟，只係間中星 期日朝早揸吓去 morning drive，好多時玩幾百公里就賣，費事出牌打百幾二百萬稅，所以好多都會自己開間貿易公司做買賣車，申請個試車牌有需要時掛上車揸去玩，但以後相信就冇 呢支歌仔唱嘞！因為開公司申請藍牌嘅要求更加嚴謹，就算申請到，掛上車用嘅限制更多，總之就係搞到你唔係幾時想用就用到。我哋公司一向冇搞開左軚車，所以 都冇詳細睇藍牌啲例，但我哋用開嘅紅牌一樣有更嚴格嘅規範化，首先要登記晒公司會用紅牌員工嘅資料上報，唔喺名單內嘅人用就冇保險同犯法，之後每次出車都 要帶成 file文件，寫明邊個揸、邊個試、路線、時間……水蛇春咁長嘅資料，一有警察查牌就要即時攞出嚟，唔係分分鐘即時「搣牌」，以後連紅牌都冇得用！
不過咁搞都有辣有唔辣嘅，因為以前好多行家都會問我哋借紅牌用，總之掛住就好似包冇衰咁，我哋有時都唔好意思婉拒。不過出咗新例之後就可以大條道理唔借，因為出事唔只累到自己俾人搣牌，借嚟用嗰個都犯法㗎！
- 文定祥
點解我見到有d車有車牌仲要掛住個T牌？
但係又唔係二手車